1Jo 1 | NAS | STEP | Niiꞌ teing kara siraꞌnuka tee-koo kapooꞌ tutunaꞌ masipoꞌketa otoi otomaung-koo, eeꞌnung naning-naumpura poko ooampiring, tee Kumponing Bakaang Kara Domang-anta-koong Okovenung.

1 John 1

Araka-koo Oꞌnoriaing Eeꞌnoko Mutaanang-nupoong Taaravarampiaukaꞌ

(1:1–3:10)

Karistooꞌ Tee Kara Domaang-poꞌnung Okovenung Siraꞌpari Otong

1 Niiꞌ teing kara siraꞌnuka tee-koo kapooꞌ tutunaꞌ masipoꞌketa otoi otomaung-koo, eeꞌnung naning-naumpura poko ooampiring, tee Kumponing Bakaang Kara Domang-anta-koong Okovenung. 2 Eeꞌ, tee Domaang Otoi-otoꞌ tampaꞌ siraꞌparioꞌ niikaang dutai ooampima taaravampikoꞌ, eeꞌnoko birenge kompampiri keerooroampiruꞌ. Teeꞌkoo diiꞌ naurarampima daankiampimaung tee Karistooꞌ Domang-anta teeꞌ nariꞌ otoi otomaung. Bauma ninka otokoꞌ eeꞌnoko depeto niiꞌanko siarara siraꞌparuꞌ. 3 Tee niiꞌke ooampira eeꞌnoko taaravampiruꞌnung daankiampimaung diiꞌkoo, diiꞌ niiꞌ ninka nariꞌ tapoꞌmeerira tampaꞌ masikaꞌ onkeonkeꞌmeeriiꞌnaang, eeꞌnoko Niuma ninka eeꞌnoko Bauring Jiisuuꞌ Karistooꞌdaang ninka nariꞌ. 4 Tee aung aneꞌ karavoto~ ninge daariansing niiꞌ ookara teeꞌ nariꞌ minkuamaatomanaꞌ nkomarira doturotue maantoꞌmuriiꞌnaang.

Tee Araka-koo Oꞌnoriaing

5 Aung tee doorenang niiꞌke taaravampiruꞌnung teieta Bauring-eta diiꞌ naurarampimaung: Kumponing tee araka eeꞌnoko tee tee-koo okiꞌnooꞌ mutaanang otoaꞌ bakei. 6 Niiꞌkoo baata aaꞌparimaing, “Niiꞌ tee ninka miirunanka,” nka mutaanang-koo otoroitaaꞌ teing teing tosiarimaing eeꞌnoko kapooꞌ masikung narung sionaꞌ otoroaꞌ. 7 Teka baata teing araka-koo otoromaing tee Jiisuuꞌ araka-koo otoinaꞌ nariꞌ teing teing oovuning ninka miirumpei otoromaung, eeꞌnoko teie erenge Kumponing Bauring Jiisuuꞌ Karistooꞌkoonge tee tontaꞌurima biikaning orakaꞌ nkonanka-ita kiiroraaꞌantavuripeuꞌ.

8 Teeꞌkoo aaꞌmariri dei, “Niiꞌ orakaꞌ nkonanka otoꞌmemuriaꞌ,” niiꞌ niiꞌka tosimaripeuꞌ eeꞌnoko kara masikung niiꞌkoo otoarupeuꞌ. 9 Niiꞌ niikaning orakaꞌ nkonanka siraꞌmariko deekoꞌ teie tee bakaang maraka-anta siompui tampaꞌ makosinaꞌ nkomuriaing eeꞌnoko orakaꞌ nkonanka tontaꞌmemurira kiiroraaꞌantamuriai ookara kapooꞌnanka koontoꞌ deeaing-eta. 10 Niiꞌ orakaꞌ nkonanka otoꞌmemuriaung tammariri dei niiꞌ teing tosimaripeuꞌ eeꞌnoko Kumponing tosi-bauko tampampipeuꞌ, eeꞌnoko bakaang kara niiꞌkoo otoarupeuꞌ.